21.1.12

الخامس والعشرون.

يسقط يسقط حكم العسكر

احنا الشعب الخط الاحمر

احنا شباب عايزين حرية

مش عايزين مصر تتأخر

ولع ولع يا مشير

اضرب فينا مش هنطير

اعمل فيها وحش كاسر اعمل فيها حتى امير

هنفضحكم انتا وجيشك من مرتزقة ومن صراصير

لو فاكرين ان الجيش نايم فببشركوا الوضع خطير

مش كله في الجيش زيكم عالسلطة كلاب مساعير

لو كنتوا اخدتوا الاخوان والنور يبقى اخدتوا فطير

اقتل واسحل فينا كمان .. ولا أقولك في المليان

مهو عندكوا احنا مش ناس, شايفين اننا دبان

لكن الشعب مسيره يفوق والحقيقة مسيرها تبان

وفي وشكم دا هيثور ولا جيش يحمي ولا بيبان

يا جيش مصر اصحى وفوق متضربش في الميدان

يا مفتري انتا وهوا انتا القاضي والسجّان

انتا القاتل والمختل, انتا درع للجبان

للبنات كشوفات عذرية وكمان السحل هان

يعني شرفنا وعرضنا في الشارع ينفع يتهان؟؟!

اصحى وفوق انتا وهوا وصلونا للأمان

مش تسيبوهم يولعوا ويحرقوا في القرآن

دا ربنا ميرضاش بالظلم حتى يا جدعان

وانتا يا اخ منك له, عاجبك يعني الحال الآن

قاعد في بيتك وسايب جسم بناتنا هناك يبان

كل اللي انتا فالح فيه "على وضع مصر قلقان"

وبتشتم في الثوار وانتا مش عارف مين اللي خان

منزلتش شوفت ولا مره ولا حتى سألت انسان

كل اللي انتا شايفه صح, فيموتوا كمان وكمان

يا اخي اصحى وفوق استرجل, ولا انتا بقيت نسوان

حتى النسوان بقوا رجاله, وانتا في بيتك عامل تعبان

اصحى وفوق منك له قبل ما ترجع ايام زمان

ونلاقي ديكتاتور تاني ونشوف مالعذاب الوان

دانتا مصري ارفع راسك وانزل يلا عالميدان

هناك 5 تعليقات:

إيناس حليم يقول...

ده انت مجهز ليوم 25 بقى :)
حلوة يا محمد.. هتافات من القلب

صباحك حرية

Mohamed Gameel يقول...

طبعًا يا ايناس :)
صباحنا حرية يا رب :)

Uouo Uo يقول...


thank you

سعودي اوتو

Uouo Uo يقول...

thx

كشف تسربات المياة
غسيل خزانات
شركة نظافة عامة

Uouo Uo يقول...


thank you

سعودي اوتو