عن المسحوق والارض الصلبة وعن ابراهيم معايا او مش معايا

وهو -الناقد- قد يبرع في التذاكي, فيقول, وقد ارتفع حاجباه: عندما تأملت, وفكرت في العنوان الذي استخدمه الكاتب وجدته مناسبًا للغاية
جزء من مقال المسحوق والأرض الصلبة 1 ( ايوه فيه واحد وليه جزء تاني وتالت كمان زي لورد اوف ذا رينجز كدا ) وهو مقال موجود في كتاب الصديق العزيز ( هوا شكله هيقطع معايا بعد الكلام الي هكتبه دا اصلا ) ابراهيم عادل
وبالنسبة للأخوة المدونين هوا ابراهيم معايا ودا لينك مدونته كمان

عن المسحوق والأرض الصلبة

عن مسحوق ايه .. متعرفش يمكن اريال او برسيل
ارض صلبة ايه متفهمش تقريبًا ارض عز الدخــ .. ولا بلاش
المهم ان ابراهيم طلع كتاب يا رداله وكان لازم الواحد يقتني الكتاب دا اللي انتظرناه من كتير
بداية اتكلم عن الغلاف, للأسف معجبنيش تمامًا, حسيت انه يخنق شوية مش بيريح العين, وان كنت اعتقد ان دا في مصلحة الكتاب ايضًا لأنه يصبح لافتًا للنظر. ولكن عمومًا الغلاف يحمل جملة لابن مالك" كلامنا لفظ مفيد كاستقم" والمزيد من الشخابيط الخلفية التي لا توحي بشيء معين واعتقد ايضًا ان هذا مقصود لأن الكتاب لا يتكلم عن شيء محدد بعينه بل يبحر بك كسفينة تمشي بين المواني بالانتقال الآني, لا تعرف ما القادم الا وانت فيه

وفي مقدمة خنيقة جدًا بتحاول تقنعك بانك متقراش الكتاب لأنك على حد قول الكاتب مش هتخسر كتير لو مقريتوش لكن في المقدمة كلمتين في الجون .. " ما ليس لدي شك فيه انك واجد نفسك هنا ولو في كلمة, ولو في سطر" وهي جملة لن تصدقها الى ان تراها

كتاب متنوع للغاية يحمل بين طياته نصوص ومقالات وكلام وبطيخ وشعر ونثر ومكنتش هتفاجيء لو لاقيت قطه بتجري ورا فار جوا, ابراهيم تعمّد تمامًا الا يمكن تصنيف الكتاب ولا يمكن نقده نقدًا صريحًا. فقط هوا عامة مجموعة من اعمال ادبية اغلبها يشعرك بالتلقائية وبعضها سيضحكك وبعضها ستجد فيه حكم جميلة ستفهمها بعد عناء لأن ابراهيم مش بيدي المعلومة بسهولة

هو واحد من قدامى المغامير وان لم تكن قد سمعت بهم فهم مجموعة ادبية لها وزنها, ولقلمه قيمة ادبية وثقل, الكتاب يدور في فلك القلم بشكل أو بآخر, يتكلم عن الكتابة نفسها وعن أشياء تهم كل من يمسك القلم, يعدك بفكرة او اثنتان قد تخرج بهمها من الكتاب وبعض المتعة المشوبة بفائدة

هذا غير انه يترك لك مساحة للفوضى ومساحة اكبر للعبث في كتابه وهذا دليل على ان عادل كريم ويتوقع الكثير من قراءه

ننتظر من ابراهيم عادل كتابًا آخر قريبًا ان شاء الله, كتابًا موجهًا اكثر, به بالطبع افتكاسات مثل هذا الكتاب وان كنت افضل ان ارى مجموعة قصصية كاملة او نصوص مترابطة اكثر في القادم

قال ايه واجب تدويني

واجب تدويني عباره عن سؤال جالي من عند الاخت ايمان صاحبة مدونة صمت المكان صخب الكلام

وانا اللي كنت فاكر الواجبات خلصت مع المدرسة

س : اذكر 6 أسرار قد لا يكتشفها من يقابلك أول مرة ؟

1. اني لست بذلك الذكاء.

2. اني مش شايف نفسي.

3. اني مش مثقف.

4. اني بحب الناس واللمه.

5. اني مالعمرانية.

6. اني ... انا !

وللأسف يجب ان اوجه هذا الواجب لستة من البشر ( دواعي الغتاته )

ونقول :

- عماد باشا حجاب

- دا فنـ شي فنان فقير

- ايموكابرتو كيلوا

- د.اسماء علي

- ايهاب عمر

- الديليكون

وبس كدا كفاية اوي..

يا رافعين راس البلد فوووووق

فكرني الخبر دا في موقع مصراوي باللي كنت بشوفه زمان كتير في المواني المصرية

كنت بسافر كل سنه مرتين السعودية, وكانت ايام ما يعلم بيها الا ربنا, اه بتخنقني معاملة السعوديين لينا المصريين, وان كان معاهم حق في مقابل الغوغاء اللي بتبقى مسافره ليهم, وانا مش بتكلم عن العمال ولا المعدمين لأ انا بتكلم عن المصريين كلهم سواء مستوى عالي ولا .. واطي

المهم انا كلامي عن اللي كنت بشوفه في المواني والجمارك سواء السعودية ولا المصرية من معامله سيئة, ولكن على قد ما المعامله السيئة حاجه, لكن اللي فعلا رهيب ويرعب, انك تلاقي ظابط الجمارك في جمرك مهم زي السويس وهوا بياخد الرشوة جوا البسبور عشان يعدي البضاعة المتهربة, بل والأسوأ اني في مرة شوفت ظابط .. تخيلوا ظابط جمارك, بياخد علبة لبان من الراجل بحجة انه معاه علبتين, والغلبان التاني قاله متغلاش عليك يا باشا واداله علبه مصاصات ولا بنبوني كمان

والمصيبة الأكبر لما اشوف ظابط تاني, والله على ما اقوله شهيد, بيقع من شنطة مواطن كيس اسود, يقوم الظابط زاقه برجله ورا الكاونتر والراجل مش ملاحظ, تخيلوا وصلت لأيه..

ليه وصلت حالت امننا والرجالة الي بيحموا البلد دي للدرجة دي, هل فعلا الفلوس بقت اهم حاجه عندهم

طيب لو في نسبه كويسه, هل هي فعلا قليلة للدرجة دي

وايه الحل في المصيبة اللي احنا فيها دي

يا خوفي لا يجي اليوم اللي نبقى ماشيين خايفين مالامن مش مالحرامية

يا رب رحمتك

رباعيات

الرباعية الاولى لجاهين بالطبع

منتاش بتلعب ليه يا روح بابا ؟
و لا عسكري و لا لص في عصابه

العب اسد أو ديب رهيب او غزال
دي الدنيا في نهاية المطاف غابه..

غابه و الوحش فيها هوا الملك
يا بقوة تهجم يا بسرعه تتهلك
الخوف غريزه و الضعيف فريسه
وعشان تعيش لازم تكون حرك.. وعجبي

عجبي على زمان قاسي.. غدار
حتى الفرح فيه بقى بمقدار
و الحزن ما في شيء بيوقفه
و لا يفرق عنده اسد من حمار

الحب كلمه من زمان اتبخرت
القلب مات ولا المشاعر اتصحرت
و لما الناس نسيوا المعاني
.. بقيت الكلمه لوحدها تعاني فاتكسّرت

وعجبي

تجديد

انه عالمي
جددت البلوج وانا عايز اجدد حياتي كلها
عايز اغير كل اللي فيها
لاقيت البلوج اسود مع ان اخر تلات اخبار فيه بيضا وتفرح
قمت قلت اقلبه ابيض
واقلب حياتي ابيض
ومرجعهاش اسود تاني
كفاية اسود بقى
كفاية استسلام بقى

بلى هو عالمي الجديد
سأضع به قواعد لا تهتز, بأن الأمل موجود مادمت حيًا
بأن الاصلاح قادم حتى ولو لم نره على مرمى البصر
بان التغيير بيدنا وان القادم افضل, رغم أنف كل من يقول ان القادم اسود اسود اسود ..

سأحاول ان اغير, قد يكون لي اثر احيانًا وقد لا يذكر هذا الاثر
ولكني سأصرخ بحريتي عبر مدونتي واصيح بألا مزيد من الدويقة والحرائق والقطارات والعبارات والفساد المستشري في كياننا
وسأتمسك بالأبيض أملا في غد افضل سننشأه بأيدينا باذن الله تعالى

عن مرور القانون الجديد

في هذا القانون الجديد, المليء بالتهديد والوعيد
وقال ايه هيخلي كل مواطن مبسوط وسعيد
نجد غرامات وفلوس وحبس أكيد
ونجد ما لم نراه عند قريب او بعيد

من حبس لاستخدام المزمار بدون اسباب كالحمار
او غرامة لأنك لا تملك حقيبة الاسعاف الجبار
او لأنك نسيت رخصتك فتذهب الى السجن بكل وقار
وبالتأكيد ممنوع الأكل او التدخين او انك تعمل في العربية زار

تناسى اصحاب القانون الجديد ما معنى التغيير
وان التغيير المفاجيء لن يأتي الا بالوبال على شعبنا الخطير
الذي لن يفتأ أن يتفنن في الاختراع والتحوير
لحد ما يوصل لمرحلة مفيش مخالفات مالوزير للغفير

مهو كلو محصل بعضو وكلو بيعدي
وقبل اي لجنه كلو بيهدي
ومالآخر عندنا مصيبه تجيب ومصيبه تودي
والوقتي اللي عنده عربيه اقوله انا على رجليا منتاش قدي


الباب اللي يجيلك منه الكمين
سيبه خالص وادخل يمين
والا هيقفشك الظابط ويعملك عجين
ولا كأنه داخل معركة حطين


المهم ان الحزام لازم كله يلبسه
واللي في بقه كلام يسكت ويدفسه
والا هيلاقي مخبر على اقرب بوكس يرفسه
ويحزن عليه اهله وباقي عمره يتعسه


قانون جديد وكل قانون وانتوا طيبين
وعلى اللي ملوش لازمه متجمعين
وعلى اللي ليه لازمه منفضين ومش فاضيين
بكره يجيلكم قانون يقول محدش يركب عربية شاهين


ولا يحطلك اتنين لتر بنزين 80 على بطاقة التموين
ويقولك بعد كدا مفيش الا خمسه وتسعين
ربنا يخليلنا احلى ناس بتطلع احسن قوانين
قولوا امييييين يا رب العالمين