فكرني الخبر دا في موقع مصراوي باللي كنت بشوفه زمان كتير في المواني المصرية
كنت بسافر كل سنه مرتين السعودية, وكانت ايام ما يعلم بيها الا ربنا, اه بتخنقني معاملة السعوديين لينا المصريين, وان كان معاهم حق في مقابل الغوغاء اللي بتبقى مسافره ليهم, وانا مش بتكلم عن العمال ولا المعدمين لأ انا بتكلم عن المصريين كلهم سواء مستوى عالي ولا .. واطي
المهم انا كلامي عن اللي كنت بشوفه في المواني والجمارك سواء السعودية ولا المصرية من معامله سيئة, ولكن على قد ما المعامله السيئة حاجه, لكن اللي فعلا رهيب ويرعب, انك تلاقي ظابط الجمارك في جمرك مهم زي السويس وهوا بياخد الرشوة جوا البسبور عشان يعدي البضاعة المتهربة, بل والأسوأ اني في مرة شوفت ظابط .. تخيلوا ظابط جمارك, بياخد علبة لبان من الراجل بحجة انه معاه علبتين, والغلبان التاني قاله متغلاش عليك يا باشا واداله علبه مصاصات ولا بنبوني كمان
والمصيبة الأكبر لما اشوف ظابط تاني, والله على ما اقوله شهيد, بيقع من شنطة مواطن كيس اسود, يقوم الظابط زاقه برجله ورا الكاونتر والراجل مش ملاحظ, تخيلوا وصلت لأيه..
ليه وصلت حالت امننا والرجالة الي بيحموا البلد دي للدرجة دي, هل فعلا الفلوس بقت اهم حاجه عندهم
طيب لو في نسبه كويسه, هل هي فعلا قليلة للدرجة دي
وايه الحل في المصيبة اللي احنا فيها دي
يا خوفي لا يجي اليوم اللي نبقى ماشيين خايفين مالامن مش مالحرامية
يا رب رحمتك
هناك تعليق واحد:
هم يضحك وهم يبكي
عارف يا محمد اقولك ليه بيسرقواوبيرتشوا
لان مرتباتهم هزيلة بعكس الشائع عن ضباط الشرطة يعنى مهندس الاتصالات الان مرتبه افضل من ضابط الشرطة الشريف
معك حق تماما فى ان القلة من رجال الشرطة شرفاء
هاقولك حاجة طريفة
ابن خالى حد محترم ومتدين جدا ولا ازكيه على الله
دخل شرطة واشتغل ضابط كام شهر
لما شاف الوضع والوسط اللى لامفروض هيتعامل فيه
حول مباشرة لمجلس الدولة وفى الطريق ليكون قاضيا الان
الثاني ابن خالى قدم استقالته وهو رائد لفساد وسط ضباط الشرطة
كنت بتكلم مرة مع ضابط مباحث "محترم" برتبة رائد
قالى ما فيش ضابط ما يضربش
الضرب دا اقل حاجة
قصدى بيضرب المتهمين
اعتقد ان شيوع الرشوة بهذه الطريقة من علامات الساعة
لاننا اصبحنا نتنفس فساداً
وخاصة رشوة
ولعن الله الراشي والمرتشي والرائش
صدق رسولنا الكريم عليه اتم التسليم
إرسال تعليق