تقولي يعني هوا كان مخبز قبل كدا, اقولك لأ, يا ريت دا كان بتنجان خالص
في الحقيقة, انا بشعرة, ساعة تروح وساعة تيجي
لأ حقيقي في البلوج
ساعات بكتب عشان حاجه اجتماعية المفروض تتكتب
ساعات بكتب عشان مش لاقي اي حاجه تانيه احسن تتعمل
ساعات بكتب عشان شايف ان في حاجه لازم اقولها للناس لازم ناس كتير تعرف انها حصلت او بتحصل
ساعات بكتب عشان الناس تقولي كويس وجميل واستمر
وساعات بكتب عشان انا نفسي اقول لنفسي كويس وجميل واستمر
كل دا حلو ولذيذ وكله كوم
واني ساعات بكتب بقى عشان لازم اكتب كوم تاني
بكتب عشان مش قادر اعمل اي حاجه غير اني اكتب
وفي الغالب, على الأغلب بيكون اللي بكتبه في الحالة الخاصة التالته دي مش كويس ومش جميل ومش استمر خالص..
بيكون كلام مختلف
بيكون كلام عن حاجات بحبها
عن لحظات عشتها
عن بتنجانه عجبتني او شوكة سمكه عورتني
مالآخر
عني انا
كلام ميهمش اي مخلوق تاني انه يقراه في الغالب
كنت بحب اكتب الكلام دا
على فترات متباعده
كل ما بحب اكتب
في أجنده زرقا كدا من اللي بتبعتهم القوات المسلحة لبابا وانا بقفشهم كعادتي الرائعة لجبي في اقتناء الاجندات
حد من صحابي قالي قبل كدا انتا المفروض بلوجك يعبر عنك
بتحب ايه
بتكره ايه
بتاكل ايه
كدا يعني
طبعًا انا كعادتي نفضت
كأني يعني هبقى صحفي عن طريق البلوج
بس الوقتي
وبعد اكتشافي ان الاجندة ضاعت
بعدما قلبت غرفتي المقلوبة اصلا وملقيتهاش
حسيت قد ايه انا ضاع مني
كانت الاجندة دي فيها اهم لحظات سنين فاتت
والوقتي شكرًا
اللي خلاني احط الاجنده البني اللي فيها اجمل كلمات صحابي ليا في الست سنين اللي فاتو في شنطتى السامسونايت واخبيها في الدولاب
اصلي مينفعش اضيع دي كمان
عمومًا
كل الكلام دا عشان اقول ان المدونة دي هتبقى محمد جميل بقى
يعني ارائي الشخصية
يعني شكلي
يعني انا
مش شوية مقالات وكلام اجتماعي وقصتين كتبتهم بالغلط
وطبعًا دا بس تنويه عشان اللي مش هيعجبهم التغيير الدراماتيكي في المدونة الي هتصبح حر شوية بعد اضافة بعض الحميمية للكلام
اللي مش هيعجبهم التغيير هقولكم على راي الاخوة السعوديين حياكم الله
بس متنسوش تقفلوا الشباك وراكم وحياة ابوكم
اما الاتنين التلاته اللي ممكن يكملوا
قشطه عليكم
والتحيات الكتير
هناك تعليق واحد:
مرحبا بك في عالم التدوين الحقيقي
هذا هو الكلام
في انتظار تدويناتك
إرسال تعليق